МегаФон Тоҷикистон дар вилояти Хатлон мавсими навбатии корҳои бомиқёсро дар самти бунёду муосиргардонии шабака хотима мебахшад. Дар арафаи солгарди раёсати минтақавии ширкат мо бо директори он Комрон Кенҷаев сӯҳбат оростем.
- Телеком – соҳаи рақобаташ баланд. Мавқеи ширкатро айни замон дар Хатлон чӣ гуна арзёбӣ менамоед?
- Бо итминон гуфта метавонам, ки мо дар қатори пешсафон ҳастем. Мо мавқеи худро сол ба сол ба шарофати сармоягузориҳои назаррас ба инфрасохтор нигоҳ медорем ва устувор менамоем. Ин барои фаъолияти босифати хизматрасониҳои алоқа ниҳоят муҳим аст. Танҳо дар соли ҷорӣ мо зиёда аз 40 пойгоҳи базавӣ (ПБ)-ро ба кор даровардем, ки сенздаҳ шаҳру навоҳии Хатлон ва қариб тамоми ҳудуди вилоятро фаро мегиранд. Боз 15 ПБ-и навро то охири сол мо ба кор хоҳем даровард. Мо фаъолона муосиргардонии таҷҳизоти мавҷудаи худро ба амал мебарорем. Ҳамин тариқ, дар соли 2025 зиёда аз 20 пойгоҳи базавии насли дуюм ва сеюм дар диапазони 4G ба кор шурӯъ карданд. Дар 30 пойгоҳ каналҳои таҳвили маълумоти стандарти 4G васеъ карда шуданд. Акнун муштариён метавонанд аз трафики бештари интернет бо суръати баландтар, ки ба талаботашон пурра ҷавобгӯ аст, баҳра баранд. Қайд кардан муҳим аст: бунёду муосиргардонӣ танҳо дар соли ҷорӣ қариб як даҳяки тамоми инфрасохтори ширкатро дар Хатлон фаро гирифт; ин ҳаҷми хеле бузурги корҳо мебошад. Чунин натиҷаҳо ҳамасола ба даст оварда мешаванд, онҳо ба мо имкон медиҳад, ки мавқеи худро дар бозор нигоҳ дорем.
- Лекин корҳо танҳо бо пойгоҳҳои базавӣ маҳдуд намегарданд?
- Албатта не. Якум ин, ки мо бояд нерӯи барқро дар ПБ таъмин намоем. Маҳдудиятҳои барқ вуҷуд доранд ва бисёре аз пойгоҳҳои базавӣ дар маконҳои дурдаст ҷойгиранд, ки дар он ҷойҳо хатҳои барқ вуҷуд надоранд. Аз ин рӯ, барои таъмини алоқаи устувор мо генераторҳои дизелӣ ва батареяҳои аккумуляториро ба кор мебарем. Онҳо ҳамчунин назорати доимиро талаб мекунанд. Аз аввали сол мо қариб 150 батареяро иваз кардем. Мо тақрибан 20 дастгоҳҳои дизелӣ-генераториро таъмир кардем ва то моҳи январ мо таъмири нақшавии боз 40 дастгоҳро анҷом медиҳем ва зиёда аз 20 генератори иловагиро насб мекунем. Мо инчунин интиқоли сӯзишвориро ба маконҳо идома медиҳем, то боварӣ ҳосил кунем, ки шабака дар фасли зимистон мунтазам кор мекунад. Ман тафсилоти пурра медиҳам, то миқёси корҳо танҳо дар ҳамин як самт беҳтар дарк карда шавад.
Дуюм ин, ки илова ба ПБ мо хатҳои алоқаи нахӣ-нурӣ ё ХАНН низ мегузаронем. Онҳо дар интиқоли ҳаҷми зиёди трафик байни шаҳрҳо ва ноҳияҳо нақши муҳим мебозанд, ба ғайр аз ин пайвастшавӣ тариқи ХАНН сатҳи устувории пайвастшавиро баланд мекунад. Аз ин рӯ, мо тадриҷан пойгоҳҳои базавиро аз хатҳои радиорелеӣ ба хатҳои нахӣ-нурӣ мегузаронем. Танҳо барои фаҳмидани он, ки ХАНН-и магистралӣ чист ва дарозии онҳо чӣ қадар аст: имсол мо ду қитъаи нав Бохтар-Панҷ бо дарозии 142 километр ва Данғара-Кӯлобро бо дарозии иловагии 108 километр ба кор андохтем. Чунин лоиҳаҳо сармоягузории назаррасро талаб мекунанд, лекин алҳол сухан дар бораи устувории пайвастшавӣ меравад. Қаблан мо дар ин минтақаҳо каналҳоро ба иҷора мегирифтем ва дар сурати ягон вайронӣ аз ширкатҳои берунӣ вобастагӣ доштем. Аммо, ҳоло ХАНН-и худро дорем, ки онҳо фаъолияти устувори хизматрасониҳоро ҳатто дар ҳолатҳои садамавӣ кафолат медиҳанд.
- Хуллас, айни ҳол дар маҷмӯъ шабакаи “МегаФон Тоҷикистон” дар вилояти Хатлон дар чӣ ҳол аст?
- Мо зиёда аз 1 200 пойгоҳҳои базавии наслҳои гуногуни алоқа дорем, ки сеяки онҳо стандарти 4G-ро бо суръати баланди интернети мобилӣ ва садҳо километр хатҳои нахӣ-нурӣ (ХАНН) дастгирӣ мекунад. Ин яке аз шабакаҳои калонтарини кишвар мебошад. Мо ҳатто пойгоҳҳои базавии мутаҳаррик низ дорем, ки дар мошинҳо насб гардидаанд. Онҳо имкон медиҳанд, ки чорабиниҳои муҳимми ҷамъиятӣ, аз ҷумла чорабиниҳое, ки дур аз шаҳрҳо баргузор мешаванд – мусобиқаҳои варзишии байналмилалӣ, машғулиятҳои низомӣ ва чорабиниҳое, ки Президенти Ҷумҳурии Тоҷикистон дар онҳо ширкат мекунад, бо алоқаи устувор таъмин карда шаванд. Масалан, дар соли 2025 мо ба ҳайси шарики IT-форум дар Бохтар баромад намуда, Wi-Fi-и ройгонро барои ҳамаи иштирокчиён ташкил кардем. Мо инчунин барои мусобиқаҳои байналмилалӣ оид ба варзиши парапланӣ дар Данғара алоқа ва интернетро пешниҳод кардем.
Мо инчунин шабакаи дигар ҳам дорем — нуқтаҳои фурӯшҳои худӣ. Айни замон дар минтақа 124 толори алоқаи “МегаФон Тоҷикистон” амал мекунанд. Ин яке аз бузургтарин шабакаҳои хизматрасонӣ маҳсуб ёфта, ба мо имкон медиҳад, ки ба муштариёнамон наздиктар бошем. Мо ҳам шабакаи фурӯшҳои чакана ва ҳам инфрасохтори техникии худро инкишоф медиҳем, то ки минтақаи Хатлон аз ҷиҳати сифати алоқа ва хизматрасонӣ ба мизоҷон яке аз беҳтаринҳо дар Тоҷикистон бимонад.